ජනප‍්‍රිය සංස්කෘතිය

                         
                               

                                                                      

                                                                                              මිනිසා ශිෂ්ටාචාරගත වීම හඳුනාගත හැකි ප‍්‍රබලම සාධකය සංස්කෘතියයි. මිනිසාට ස්වභාවධර්මයෙන් ලැබුනු දේවල් වලට අමතරව එදිනෙදා අවශ්‍යතාවන් වෙනුවෙන් මිනිසා විසින්ම නිර්මාණය කර ගත් සිරිත් විරිත්, ඇදහිලි, විශ්වාස, අධ්‍යාපනය, දේශපාලනය, ආගම්, වෘත්තීන්, වෙද හෙදකම්, කලාව, භාෂාව ඒ අතර වේ. සංස්කෘතියේ විවිධ ප‍්‍රභේද පවතී. ඒ අතර ජනප‍්‍රිය සංස්කෘතියට හිමි වන්නේ සුවිශේෂී ස්ථානයකි. අද සමාජයේ සිදුවන සෑම දෙයක්ම පාහේ සිදු වන්නේ ජනප‍්‍රිය තත්වයන් අපේක්ෂා කරමිනි. ජනප‍්‍රිය යන්නෙහි වචනාර්ථය ‘ජනයා අතර ප‍්‍රිය වූ’, ‘ජනයා සමඟ වැඩෙන’ යන අර්ථ ගෙන දෙයි. එය ඉංග‍්‍රීසි භාෂාවෙන් popular culture  ලෙස අර්ථ ගැන්වේ.14 හා 16 වන සියවස් අතර කාලයේ පුරාණ ග‍්‍රීසියේ පුනරුද යුගයේ සිට ජනප‍්‍රිය සංස්කෘතියේ බිහි වීම ආරම්භ විය. 19 වන සියවසේ දී ව්‍යවහාරයට එක් වූ ජනප‍්‍රිය සංස්කෘතිය කාර්මීකරණය, නාගරීකරණය හා ගෝලීයකරණය සමඟ ප‍්‍රචලිත වූ අතර 20 වන සියවස වන විට වඩාත් ප‍්‍රචලිත විය. ජනප‍්‍රියත්වය කාලයෙන් කාලයට වෙනස් වන සාධකයකි. සමාජයේ පවතින හොඳ මෙන්ම නරක ක‍්‍රියාකාරකම් ද ජනප‍්‍රිය වීමට ගත වන්නේ ඉතාමත් සුළු කාලයකි. යම් කිසි භාණ්ඩයක්, පුද්ගලයෙක්, සිද්ධියක්, චර්යාවක්, විලාසිතාවක් ජනප‍්‍රියත්වයට පත් විය හැක. මෙම කුමන හෝ සාධකයක් ජනප‍්‍රිය වන්නේ එය ජනයාගේ හඳ බැද ගන්නා නිසාය. එයින් ඔවුන්ට යම් කිසි වින්දනයක් නැතිනම් ප‍්‍රයෝජනයක් ලැබෙන නිසාය. සංස්කෘතිය යන්න අධ්‍යයන විෂයක් ලෙස ලෝකයේ වර්ධනය වීමත් සමඟ ඒ තුළ ජනප‍්‍රිය සංස්කෘතිය යන මාතෘකාව ද පුළුල් ලෙස විග‍්‍රහ කිරීම ආරම්භ විය. ලෝකයේ ජනප‍්‍රිය අංග නිර්මාණය වීම ආරම්භ වූයේ මානව ශිෂ්ඨාචාරයේ ආරම්භයත් සමඟය.       

                                           ජනප‍්‍රිය සංස්කෘතිය යන සංකල්පය සමාජ කථිකාවන් තුළ මගහැර යා නොහැකි සංකල්පයකි.සංස්කෘතිය පිළිබඳව අධ්‍යයනය කරන විට සංස්කෘතික විකාශනයේ නවතම අංගය ලෙස ජනප‍්‍රිය සංස්කෘතිය හඳුනා ගත හැකිය. යම් දෙයක් ජනප‍්‍රිය වන්නේ ජනයා අතර නිතර ගැටීමට ලක් වන නිසාය. යම් දෙයක් හුදෙකලාව මනුෂ්‍ය වාසයෙන් වියුක්තව පවතින්නේ නම් එය ජනප‍්‍රිය වන්නේ නැත.පවතින සංස්කෘතික ලක්ෂණ වලට නවීන ලක්ෂණ එක්වීම ද ජනප‍්‍රිය සංස්කෘතිය ලෙස හැඳින්විය හැකිය. ජනප‍්‍රිය සංස්කෘතිය බිහි වන්නේ මිනිසා ශිෂ්ඨාචාර ගත වීමත් සමඟය. වනාන්තර වලට වී ඉතාමත් ප‍්‍රාථමික දිවි පෙතෙක් ගත කල වානරයින් පරිණාමය වීමෙන් පසුව සමාජය නිර්මාණය කර ගත් අතර ඒ තුළ ඔවුන්ට ආවේණික වූ සංස්කෘතියක් බිහි කර ගැනීමෙන් පසුව එම සංස්කෘතිය තුළ ඔවුන් වඩාත් ප‍්‍රිය කල හා ඔවුන් සමඟ වඩාත් බැදී පැවති අංගයන් ජනප‍්‍රිය සංස්කෘතිය බවට පත් විය. එය භාෂාව, සිරිත් විරිත්, ඇදහිලි, ආහාර, වස්ත‍්‍ර, කලාව, අධ්‍යාපනය, කර්මාන්ත, යනාදී සියල්ල මතින් ගොඩනැගුනි. 

                                    ජනප‍්‍රිය සංස්කෘතිය තුළ දක්නට ලැබෙන ලක්ෂණ ලෙස

x හොඳ හෝ නරක දෙයක් වීම

x කාලයෙන් කාලයට වෙනස් වීම

x බුද්ධියට වඩා හැඟීම් වලට ආමන්ත‍්‍රණය කිරීම

x රසවින්දනය මූලික වීම

x අනුකාරකවාදීබව

x ඇබ්බැහිවීම

x තරඟකාරීත්වය

x වාණිජකරණයට ලක් වීම

x සරළබව

x ආකර්ශනීයබව

                          දැක්විය හැකිය.

                                         ජනප‍්‍රිය සංස්කෘතිය බොහෝ දුරට රදා පවතින්නේ ජනමාධ්‍ය මතය. පුවත්පත්, සඟරා, ගුවන්විදුලිය, රූපවාහිනිය මෙන්ම අන්තර්ජාලය හරහා අද වන විට නව මාධ්‍ය වෙතද අද එය පිවිස තිබේ. කේ. ටියුනර් පවසන ආකාරයට ජනප‍්‍රිය සංස්කෘතිය ජනමාධ්‍ය මතද ජනමාධ්‍ය ජනප‍්‍රිය සංස්කෘතිය මතද වශයෙන් සහවී සම්බන්ධයක් පවතියි.  ජනප‍්‍රිය සංස්කෘතියේ අනෙකුත් අංග අතුරින් ජනප‍්‍රිය චරිත වලට හිමි වන්නේ සුවිශේෂී වූ ස්ථානයකි. යහපත් මෙන්ම අයහපත් චරිත ද ලෝකයේ ජනප‍්‍රියත්වයට පත්ව තිබේ. උදාහරණයක් වශයෙන් ගත හොත් හිට්ලර් ලෝකයට මහත් ව්‍යසනයක් සිදු කල පුද්ගලයෙක. තෙරේසා මව්තුමිය ලෝකයට මහගු සේවයක් කල අයෙකි. එහෙත් මොවුන් දෙදෙනාම ලෝකයේ අදටත් ජනප‍්‍රිය ප‍්‍රතිරූප දෙකකි. ඇතැම් චරිත සමාජයේ ජනප‍්‍රිය වන්නේ එක්තරා කාල වකවානුවකට පමණි. එහෙත් ඇතැම් චරිත වල ජනප‍්‍රියත්වය ඔවුන් මිය ගිය පසුව වුව ද නොවෙනස්ව පවතී. එයට හේතු වන්නේ සහෘද ජන මනස තුළ ඔවුන්ගේ ක‍්‍රියා කලාපයන් නිධන්ගතව තිබීමයි. ජනප‍්‍රිය චරිත අනුකරණය කිරීමද මේ නිසා දක්නට ලැබෙන අතර අදාළ චරිතයේ ඇඳුම් පැලඳුම්, අභිචාර විධීන් සාමාන්‍ය ජනතාව අනුකරණය කිරීමට පෙලඹෙති. මෙම අනුකරණය තුළින් මිනිසුන් තම අභිමානය, පෞර්ෂත්වය වර්ධනය කර ගැනීමට උත්සාහ කරති. උදාහරණයක් වශයෙන් ලෝකයේ ඉතාමත් ජනප‍්‍රිය ගායකයෙක් වූ මයිකල් ජැක්සන්ගේ ඇඳුම් විලාසිතා ජනතාව අනුකරණයට පෙළඹීමත් සමඟ වෙළඳපල තුළ තරඟකාරීත්වය ද ඉහළ ගියේය. ඒ නිසා අද වෙළඳ භාණ්ඩ අලෙවි කිරීමේ උපක‍්‍රමයක් ලෙස ද ජනප‍්‍රිය චරිත භාවිතා කරයි. මිනිසුන් ඇතැම් ජනප‍්‍රිය චරිත දේවත්වයෙන් පවා අදහති. ඉංදියාවේ සිනමා නළු නිලියන් එරට ජනතාව දේවත්වයෙන් ඇඳහීම මෙයට කදිම උදාහරණයයි.